Дар шаҳри Душанбе насби низоми нави радарҳо ва камераҳо оғоз гардид, ки қоидавайронкуниҳои гуногуни ҳаракати роҳро сабт намуда, маълумотро ба пойгоҳи ягона интиқол медиҳанд. Ин дастгоҳҳо 19 намуди қоидавайронкуниҳоро сабт мекунанд, аз ҷумла зиёд кардани суръат, набудани камарбандҳо, истодан дар ҷойҳои номатлуб, ба мисли хати дуюм ва сеюм, истгоҳҳои нақлиёти ҷамъиятӣ ва баромадан ба хати муқобил. Ин низом дар доираи лоиҳаи «Низоми автоматии бақайдгирии қоидавайронкуниҳои ҳаракати роҳ» ва барномаи «Шаҳри доно» дар асоси созишномаи сармоягузорӣ аз ҷониби консорсиуми сармоягузорон амалӣ мегардад. Ҳадафи асосии ин лоиҳа — пешгирии қоидавайронкуниҳои ҳаракати роҳ ва инчунин сари вақт муайян кардан ва бақайдгирии онҳо мебошад.
Дар давоми ним сол дар 135 чорроҳаи шаҳр насби зиёда аз 300 камера, ки инчунин роҳҳои баландсуръатро фаро мегиранд, ба нақша гирифта шудааст. Дар айни замон дар реҷаи озмоишӣ 23 маҷмӯи радарҳо ва 16 камера, ки дар қитъаҳои серодами шаҳр насб шудаанд, фаъолият мекунанд. Низом ба беҳтар кардани бехатарӣ дар роҳҳо нигаронида шудааст, зеро яке аз сабабҳои асосии садамаҳои нақлиётӣ дар Тоҷикистон вайрон кардани қоидаҳои ҳаракати роҳ, хусусан зиёд намудани суръат мебошад. Камераҳо ва радарҳо чунин қоидавайронкуниҳоро ба таври автоматӣ сабт мекунанд, ба мисли гузаштан аз чароғаки сурх, баромадан ба хати муқобил, риоя накардани аломатҳои роҳ ва хатҳои роҳ. Ҳар як қоидавайронкунӣ аксбардорӣ шуда рақами воситаи нақлиёт сабт мегардад ва маълумот ба Раёсати нозироти давлатии автомобилии ВКД Ҷумҳурии Тоҷикистон (РДА ВКД ҶТ) интиқол дода мешавад.
Баъди сабти қоидавайронкунӣ, нозир маълумотро месанҷад ва агар он тасдиқ гардад, ба соҳиби воситаи нақлиёт ҷарима таҳмил мегардад. Дар ҳолати нокифоя будани далелҳо ё норавшан будани рақами давлатӣ ҷарима таҳмил намешавад. Пас аз тасдиқ шудани қоидавайронкунӣ, соҳибони воситаҳои нақлиёт паёми SMS дар бораи ҷарима мегиранд. Барои гирифтани маълумоти иловагӣ дар бораи ҷаримаҳо ва дидани далелҳо (акс ва видео), ронандагон метавонанд дар портали www.neru.dc.tj сабти ном шаванд.